Вашингтонда орналасқан Global Financial Integrity сараптама орталығы соңғы 20 жылда АҚШ-тың 22 штатындағы коммерциялық жылжымайтын мүлікке 2,6 миллиард доллардан астам күдікті қаражат инвестицияланғанын хабарлады. Нақты көрсеткіш әлдеқайда жоғары болуы мүмкін.
Баяндамада күдікті инвестициялардың 25 дерегі анықталғаны, оның сегізі шетелдің мемлекеттік қызметкерлері немесе олардың туыстарына қатысты екені айтылады. Ұйым мәліметінше, ақша әлемнің түкпір-түкпірінен, соның ішінде Қазақстан, Иран, Солтүстік Корея, Ресей және Мексикадан келіп, қонақүйлер, сауда орталықтары, супермаркеттер, музыкалық студия мен ат спорты кешенін сатып алуға жұмсалған.
Сараптама орталығының баяндамасында Алматының экс-әкімі Виктор Храпунов, ҚТЖ-ның бұрынғы басшысы Сауат Мыңбаев, сондай-ақ Казкоммерцбанктің бұрынғы тең қожайыны Асқар Алшынбаев туралы айтылған. Соңғы екеуінің есімі қатар аталады. Сарапшылардың мәліметінше, Храпунов Нью-Йорк пен Огайодағы сауда орталығын, психиатриялық мекеме мен бизнес орталығын 35 миллион долларға алған. Алшынбаев пен Мыңбаев Нью-Йорк пен Флоридада 391 миллион долларға кеңсе ғимараттары мен коммерциялық пәтерлер сатып алған, деп жазады Nege.Aqsha арнасы.