Қызылорда облысына қарасты Жаңақорған ауданы – соңғы жылдары серпінді дамып келе жатқан өңірлердің қатарында. Ауданда инфрақұрылымдық жаңғыру, ауыл шаруашылығы мен кәсіпкерлікті қолдау бағытында ауқымды жобалар жүзеге асуда. Өңірдегі өзгерістермен танысу мақсатында республикалық және жергілікті БАҚ өкілдеріне арналған баспасөз туры ұйымдастырылды.
БАҚ өкілдерінің сапары Жаңақорған кентіндегі жақында пайдалануға берілген аспалы көпірден басталды. Бұл стратегиялық нысан – 15 елді мекеннің 22 мыңнан астам тұрғынын «Батыс Еуропа – Батыс Қытай» халықаралық дәлізімен тікелей байланыстырады. Бұрын тұрғындар айналма жолмен қатынаса, енді көпір арқылы уақыт пен жол шығынын үнемдеп, қауіпсіз әрі тиімді қозғалыс мүмкіндігіне ие болды. Құны 1,4 млрд теңгені құрайтын көпірдің екі жағына жаяу жүргіншілерге арналған жол және жарық шамдары орнатылған.
Келесі нысан – қуаты арттырылған «Жаңақорған Автоматтандырылған Газ Тарату Станциясы». Құны 2,3 млрд теңге болатын бұл жоба аяқталуға жақын, бүгінде 98 пайызға дайын. Жоба іске қосылған соң, 8 елді мекеннің 11 мыңнан астам тұрғыны табиғи газбен қамтылады.
Баспасөз туры барысында журналистер Қыраш ауылдық округіндегі «Қадіржан» жеке кәсіпкерлігінің сабын өндіру цехына барды. «Ауыл аманаты» бағдарламасы аясында ашылған бұл цехта тәулігіне 100-200 дана сабын өндіріледі. Жергілікті кәсіптің дамуына жол ашқан жобаның өңір экономикасына оң ықпал етері сөзсіз.
Сапар барысында Шалқия кентінде салынып біткен асфальт зауыты да таныстырылды. 6 гектар аумақты алып жатқан өндіріс орны индустрияландыру картасына енгізілген. Зауыт іске қосылғаннан кейін аудан жолдары сапалы құрылыс материалымен қамтылады. Сонымен қатар, мұнда 10 адам тұрақты жұмыспен қамтылмақ.
Ауыл шаруашылығы бағытындағы жобалар да назардан тыс қалмады. БАҚ өкілдері Жайылма ауылындағы «Мырзатай» шаруа қожалығында болды. Қожалықта ерте көктемде егілген қарбыз бүгінде пісіп, ішкі нарыққа жөнелтіле бастады. Биыл 3 гектар жерге егілген Жайылманың қарбызы – табиғи дәмі мен сапасы жағынан сұранысқа ие өнімдердің бірі. Қарбыздар жергілікті сауда орындарымен қатар, еліміздің өзге аймақтарына да жеткізілуде.
Сапар соңында тілшілер Екпінді елді мекеніндегі инженерлік-коммуникациялық инфрақұрылым жұмыстарының барысымен танысты. Атап айтқанда, жаңа электр желілері тартылып, 936 тұрғын сапалы әрі тұрақты электрмен қамтылады.
Жалпы, Жаңақорған ауданында жүзеге асырылып жатқан жобалар өңірдің экономикалық және әлеуметтік әлеуетін арттыруға бағытталған. Жаңартылған инфрақұрылым мен өндірістік қуат – аудан дамуының нақты көрсеткіші. Алдағы уақытта да бұл бастамалар өз жалғасын табатыны анық.
