Елімізде жыл сайын 4,5 млн тоннадан астам коммуналдық қалдық жиналады, оның тек 25,8%-ы ғана қайта өңдеуге жіберіледі. Ахуалды жақсарту үшін заманауи инфрақұрылым белсенді дамып келеді. Толығырақ бұл жайында ОКҚ алаңында өткен баспасөз конференциясы барысында ҚР экология және табиғи ресурстар вице-министрі Мансур Ошурбаев айтып берді.
Қалаларда тапсырылған қайталама шикізат үшін бонустар төлейтін экобокстар мен фандоматтар орнатылады. Мәселен, жеке компания Астана, Алматы, Ақтөбе және Өскеменде пластик пен алюминий жинауға арналған 100-ден астам фандоматты орналастырды. Тамыз айының соңына дейін пилоттық жоба аясында Астана мен Жезқазғанның 129 мектебінде қоқысты бөлек жинауға арналған 1 мыңнан астам экобокс қойылады. Қалдықтарды сұрыптау және қайта өңдеу үшін инфрақұрылым жасау жұмыстары жалғасуда. Қазіргі уақытта 63 жоба мақұлданды, бұл жыл сайынғы өңдеу қуатын 1,1 млн тоннаға арттыруға мүмкіндік береді. Оның ішінде 14 жоба 52,4 млрд теңгеге қаржыландырылды, құны 106,9 млрд теңгеге тең тағы 23 жоба сараптаманың соңғы сатысында тұр.
«ҚТҚ полигондары қалдықтарды басқару жүйесінің маңызды элементі болып қала береді. 2024 жылдың қорытындысы бойынша елімізде 2 973 полигон болған, алайда олардың тек 20%-ында ғана қажетті рұқсат құжаттары бар. Жағдайды түзету үшін Үкімет 2023 жылы 100 жаңа полигон салу, жұмыс істеп тұрған 8 полигонды кеңейту және 5 полигонды рекультивациялау жөніндегі кешенді жоспарды бекітті. Бүгінгі таңда әкімдіктер 7 жаңа нысан салып, пайдалануға берді, 23 полигон бойынша жобалық құжаттаманы дайындау аяқталды, 18 жоба әзірленіп жатыр. Сонымен қатар Министрлік 11 өңірде кәдеге жарату алымы есебінен 43 полигон құрылысын қаржыландыру мәселесін пысықтауда», – деді спикер.
«Таза Қазақстан» жобасы аясында елімізде орман санын арттыру және көгалдандыру жұмыстары жүргізілуде. Мысалы, Арал теңізінің құрғаған түбіне сексеуілдің 48,7 млн дана көшет отырғызылды. Өткен жылдың соңында Қазалы қаласындағы 33 га алаңда қуаттылығы жылына 3 млн көшет болатын орман питомнигінің құрылысы аяқталды. Питомникте агротехникалық талаптарды ескере отырып, 10 га жерге сексеуіл тұқымын отырғызу жұмыстары жүргізілді. Биыл ауданы 15 га питомникті жобалау және тікелей Аралдың құрғатылған түбінде ұңғымаларды бұрғылау жұмыстары жүргізіліп жатыр, қызметкерлерге өндірістік модульдер жеткізілді.