Aikyn.kz бірнеше күн бұрын cnbc.com сайты жариялаған хабарламаға сүйеніп, Trump Organization ұйымының T1 смартфоны айналасындағы белгісіздікті түсіндіреді.
АҚШ президентінің ұлдары Эрик пен кіші Дональд Трамптар Trump Mobile брендінің жаңа тарифтік жоспары қосылғанын жариялады. Иллюстрация yahoo.com сайтынан алынды
АҚШ президентінің ұлдары Эрик пен кіші Дональд Трамптар басқаратын Trump Organization компаниясы 16 маусым күні Trump Mobile брендімен тарифтік жоспардың іске қосылғанын жариялады. Trump Mobile (немесе T1 Mobile) мобильді қызметі T-Mobile желісі арқылы сымсыз байланыс қызметтерін ұсынатын Liberty Mobile Wireless компаниясының негізінде жұмыс істейтін болады.
Ұялы байланыс қызметінің іске қосылуымен бір мезгілде Trump Organization ұйымы алтын түстес T1 смартфонын таныстырып, бағасы 499 доллар болады деп жариялады. Компания сайтының басты бетінде: «Біздің АҚШ-та ЖАСАЛҒАН T1 телефонымыз алдын ала тапсырысқа қолжетімді» деген баннер орналастырылған болатын. Кейін бұл өндіріс орны туралы сілтеме сайттан мүлде алынып тасталды.
Осылайша АҚШ президенті Дональд Трампқа тиесілі Trump Organization өзінің алғашқы смартфонының АҚШ-та жасалатыны туралы мәлімдемесінен бас тартты. Себебі 499 долларға бұндай құрылғыны Америка аумағында өндіру мүмкіндігіне қатысты күмәндер туындаған. Соған қарамастан, Trump Organization өкілдері бұл телефонның АҚШ-та жасалатынын айтуда.
Қазір T1 смартфонының веб-бетінде құрылғының «америкалықтар мақтан тұтатын дизайны бар» және «дәл осы жерде, АҚШ-та шығарылған» деп жазылған. Алайда бұл оның расында да Америкада өндірілетінін білдіре ме, ол жағы белгісіз болып тұр.
T1 алғаш жарияланған кезде сарапшылар CNBC-ге бұл құрылғы Қытайда жергілікті компания арқылы өндірілетін шығар деген пікір білдірді. Себебі АҚШ-та смартфон өндіруге қажетті дамыған жеткізу тізбегі жоқ. Ал болған күнің өзінде, көптеген компоненттерді шетелден әкелуге тура келер еді. Бұл смартфонның өзіндік құнын бірден өсіріп жіберер еді.
Трамптың саясаты – технологиялық өндірістің барлығын АҚШ-қа қайтару. Иллюстрация uk.news.yahoo.com сайтынан алынды. Авторлығы: Getty Images / HuffPost
Trump Mobile өкілі Крис Уокер USA Today-ге берген мәлімдемесінде: «T1 телефондары мақтанышпен Америкада жасалады. Бұған қарама-қарсы пікірлер – шындыққа жанаспайды», – деген сөздерді қайталаған.
Смартфонның арнайы сайтында өндіріс орны ғана емес, T1 құрылғысының басқа техникалық сипаттамалары да өзгертілген. Алғашқы жарияланымда T1-де 6,8 дюймдік AMOLED экраны болатыны айтылса, қазір бұл 6,25 дюймдік AMOLED дисплейге ауыстырылған. Бұрын көрсетілген 12 гигабайт жедел жад (RAM) жайлы сілтеме де алынып тасталған.
Смартфон өндірушілері үшін құрылғының техникалық сипаттамаларын анонстан кейін өзгерту – сирек кездесетін құбылыс. Трамптың саясаты – технологиялық өндірісті қайта АҚШ-қа қайтару болатын. Бастапқыда оның назары жартылай өткізгіштер өндірісін кеңейтуге бағытталса, қазір ол смартфон өндіруге ден қойған. Сонымен қатар, ол Apple компаниясының жеткізу тізбегін мұқият зерттеп, iPhone телефонын АҚШ-та шығаруға шақырған. Сарапшылар болса, бұндай қадам АҚШ нарығында iPhone бағасын 3000 долларға дейін өсіруі мүмкін екенін ескертуде.