Ресей армиясы Киев қаласына жасаған зымыран шабуылы кезінде АҚШ-тың Boeing компаниясының Украинадағы өкілдігі орналасқан ғимаратқа соққы жасады.
Бұл туралы Financial Times (FT) басылымы хабарлады. Аталған шабуылдан кейін ғимараттың бірнеше қабаты отқа оранып, айтарлықтай зақым келген.
Украина Сыртқы істер министрлігі бұл оқиғаға қатысты пікір білдіріп, “Ресей АҚШ бизнесіне әдейі шабуыл жасап отыр” деп мәлімдеді. Шабуыл салдарынан зардап шеккендер жоқ, дегенмен нысан толықтай қирап, инженерлік қызмет тоқтап қалғаны хабарланды.
Куәгерлер мен Украинадағы Америкалық сауда палатасының деректеріне сүйенсек, соққы жасалған нысан – Киевтегі Глубочицкая көшесі, 4-үй мекенжайында орналасқан бес қабатты әкімшілік ғимарат. Қатаң күзетілетін, ешқандай белгісіз ғимараттың 4-қабатында Boeing Ukraine LLC компаниясының кеңсесі орналасқан.
Financial Times тілшілері жағдаймен таныс алты дереккөзбен сұхбаттасып, бұл шабуылдың Boeing компаниясына тікелей бағытталғанын анықтаған. Басылым шабуылды “америкалық аэроғарыш алпауытын көздеген әдейі соққы” деп сипаттайды.
Қазіргі таңда Boeing компаниясы Украинада негізінен инженерлік-техникалық қолдау бағытында жұмыс істейді. Сонымен қатар украиналық “Антонов” авиазауытымен әріптестік байланыс орнатқан. Компания Украинада 1000-нан астам адамды жұмыспен қамтып отыр, ал жұмысқа қабылдау әлі де жалғасып жатқанын көрсететін бос орындар жиі жарияланып тұрады.
Boeing өкілі FT-ге берген түсініктемесінде:
“Шабуыл кезінде ешкім зардап шеккен жоқ. Офиске зақым келсе де, компания жұмысы тоқтаған жоқ”, — деп мәлімдеді.
Украина Сыртқы істер министрінің орынбасары Андрей Сыбига FT-ге берген сұхбатында шабуылды АҚШ пен Батыстың Украинаға жасап жатқан қолдауына қарсы әрекет ретінде бағалап отыр:
“Ресейдің Украинадағы америкалық компанияларға жасаған шабуылы — Путиннің АҚШ-тың бейбіт бастамаларына немқұрайлы қарауының тағы бір дәлелі. Бұл жағдай АҚШ-тың бейбіт процестерге де, Еуропа мен Украинаның қауіпсіздігін қамтамасыз етуге де белсенді қатысуының қаншалықты маңызды екенін көрсетеді”, — деді Сыбига.
Financial Times басылымының жазуынша, бұл оқиға Ресей мен АҚШ арасындағы қарым-қатынасты одан әрі ушықтыруы мүмкін. Сонымен қатар, Ресейдің Украинадағы Батыс компанияларына әдейі шабуыл жасауын Кремльдің жаңа стратегиясы ретінде қарастыруға болады.