Мемлекет басшысы Қасым-Жомарт Тоқаевтың тапсырмасымен жүзеге асқан маңызды істің бірі – заңсыз иемденген қаржыны қоғам игілігіне қайтару. Осындай қаржының есебінен Атырау облысында мектеп-интернаттың құрылысы басталды.
Оқушыларға арналған интернаты бар жаңа білім ордасы Жамансор ауылында бой көтереді. Қызылқоға ауданында теміржол бойында орналасқан аталған елді мекенде мектеп жасындағы 200-ге жуық бала бар. Мұнда бастауыш сыныптың оқушылары 60 орынға бейімделген ғимаратта білім алуға мәжбүр. Ал бейімделген нысанда спорт және мәжіліс залы жоқ.
Қазір бастауыш сыныптар мен дайындық топтарында 64 бала тіркелген. Ал жоғары сыныптардың оқушылары Атырау мен Құлсары қалаларындағы, Мақат және Мұқыр стансаларындағы мектеп-интернатта білім алады.
Атырау облысы әкімінің орынбасары Қайрат Нұртаевтың айтуынша, құрылысы басталған мектеп-интернат үшін екі нысан салынатыны қарастырылған. Оның бірі – 80 орындық мектеп, ал екіншісі – 30 орынға есептелген интернат.
«Президенттің айқын ұстанымы – қайтарылған қаржыны ел игілігіне жұмсау. Мемлекетке қайтарылған активтер қаржысының бір бөлігі Жамансор ауылында жаңа мектеп-интернаттың құрылысына жұмсалады. Бұл жоба шалғай ауылдағы балалардың сапалы білім алуына қолайлы жағдайдың кепілі болады», деді Қайрат Нұртаев.
Облыстық құрылыс, сәулет және қала құрылысы басқармасының тапсырысымен салынатын білім ордасы прокуратураның бақылауына алынып отыр. Атырау облысының прокуроры Бауыржан Жұмахановтың пікірінше, мектеп-интернаттың құрылысын алдағы қараша айына дейін аяқтау көзделіпті. Құрылыстың сапалы жүргізілуіне жауапты мердігер – «Жиенбай» ЖШС. Ал «Aspab Engineering Grup» ЖШС техникалық қадағалауды, «A&K Али Company» ЖШС авторлық бақылауды жүргізеді.
Жамансор ауылының тұрғындары мектеп-интернат құрылысының басталғанын қуанышты жаңалық ретінде қабылдап отыр. Өйткені ауыл тұрғыны Бағдабай Амановтың айтуынша, бұрын балаларды өзге ауылдардағы мектеп-интернаттарға тасымалдап келген. Әсіресе қысқы мезгілде қиындық жиі туындайды.
«Балалар ата-анасының жанында білім алғаны жөн ғой. Алайда осы кезге дейін біз мұндай мүмкіндікке қол жеткізе алмадық. Жамансорда жоғары сыныпқа арналған білім ордасы жоқ. Сол себептен оқушыларды көршілес елді мекендердегі интернаттарға жіберетін едік. Балаларымыз ата-анасынан жырақтауды қаламаса да амалсыздан кететін еді. Енді өз ауылымызда заманауи мектеп-интернат ашылса, алдымен балаларымыз қуанатын болды», дейді Бағдабай Аманов.
Жолдасбек Көшербайұлы