Астана тұрғыны Дәулет Мұратов Қазақстан Қорғаныс министрлігін сотқа берді.
Себеп – 2025 жылғы 7 мамырда Отан қорғаушылар күні мен Ұлы Отан соғысындағы Жеңістің 80 жылдығына арналған әскери парадты өз пәтерінің балконынан көруге тыйым салынуы.
– Мен заңгермін және 2025 жылғы 26 мамырда Қорғаныс министрлігіне қарсы сотқа талап арыз түсірдім. Себебі 7 мамырда маған балконнан парадты көруге тыйым салынды. Енді сот не дейді, көрейік, – деп жазды ол Threads әлеуметтік желісінде.
Пікір қалдырған қолданушылар астаналық азаматты қолдап, мұндай шектеулердің шамадан тыс екенін атап өтті. Кейбіреулер егер тұрғындарға оны көруге рұқсат етілмесе, парадты елорданың орнына Ақмола облысының даласында өткізуді ұсынды.
Басқалар бұл талап арыз тек Қорғаныс министрлігіне ғана емес, сонымен қатар қауіпсіздік шараларына жауапты Мемлекеттік күзет қызметіне (МҚҚ), Ішкі істер министрлігіне (ІІМ) және Астана қалалық полиция департаментіне де бағытталуы керек еді деген пікір білдірді.
Еске сала кетейік, Астанадағы әскери парад соңғы бес жылда алғаш рет өтті. 2020 және 2021 жылдары ол пандемияға байланысты, ал 2022–2024 жылдары бюджет үнемдеу мақсатында өткізілмеген болатын.
Айта кетерлігі, парад кезінде дрон Астана тұрғыны Әлия Қуаныштың терезесіне жақындап, дауыс зорайтқыш арқылы қауіпсіздігі үшін терезеден алыстауды сұраған.