Оның айтуынша, 2 мыңнан астам өтінімнің түсуі мыңдаған жастардың ғылым, мәдениет, бизнес, IT, медиа және волонтерлік салаларда өз идеялары мен шешімдерін ұсынуға дайын екенін көрсетеді.
«Бұл жастардың дайын мүмкіндікті күтпей, өз бастамасын жүзеге асыруға ұмтылысының айқын көрінісі. Мұндай бастамалар еліміздің әр өңірінде бар, яғни бұл мыңдаған жас қазақстандықтың белсенділігін көрсетеді. Креативті индустриялардың дамуында да үлкен әлеует бар екенін көріп отырмыз. Заңнамалық және қаржылық инфрақұрылым нығайтылып, өңірлерде креативті орталықтар ашылып жатыр. Креативті индустрияны дамыту қоры өз жұмысын бастады. Сала өкілдеріне «Болашақ» бағдарламасы аясында білім алып, тағылымдамадан өту мүмкіндігі берілді», – деді спикер ОКҚ алаңында.
Сондай-ақ вице-министр креативті экономика және жастардың бұл саладағы рөлі жайында сөз қозғады. Яғни, бұл – жаңа жұмыс орындары, заманауи ұлттық контент және қазақстандық мәдениетті әлемге таныту мүмкіндігі, жас авторды, режиссерді, музыкантты, зерттеушіні немесе әзірлеушіні қолдау – бір адамның бастамасына ғана емес, елдің мәдени дамуына салынған инвестиция. Креативті индустриялардың ел экономикасындағы рөлі жыл сайын артып келеді. Бұл салада мыңдаған кәсіпкер мен маман еңбек етіп, жаңа жұмыс орындары құрылып жатыр.
«Қазір бұл салада 46 мың шағын және орта кәсіпкерлік субъектілері жұмыс істеп, шамамен 156 мың адам еңбек етеді. Олар жаңа өнімдер ұсынып, жұмыс орындарын ашып, заманауи ұлттық контенттің қалыптасуына үлес қосып келеді. Сондықтан креативті индустрияларды дамыту – жастардың әлеуетін ашып, олардың елдің экономикалық әрі мәдени дамуына үлес қосуының маңызды бағыттарының бірі», – деді Е.Кочетов.
Сонымен қатар Мәдениет және ақпарат вице-министрі жастардың ел өміріне белсенді араласуы туралы айтты. Оның пайымдауынша, жастар үшін өз пікірінің ескерілуі және қоғамдағы үдерістерге ықпал ете алуы маңызды. Осы бағытта қоғамдық кеңестердегі жастардың өкілдігі артып, Президент жанындағы Жастар саясаты жөніндегі кеңес пен өңірлік жастар кеңестері жұмыс істейді.
Қазақстан Республикасы Президентінің жанындағы Жастар саясаты жөніндегі кеңес мемлекеттік жастар саясатын іске асыруға белсенді атсалысып келеді. Кеңестің тікелей қатысуымен Нашақорлыққа және есірткі бизнесіне қарсы күрестің 2023-2025 жылдарға арналған кешенді жоспары әзірленіп, жүзеге асырылды. Сондай-ақ Кеңестің қатысуымен заңсыз ойын бизнесі мен лудоманияға қарсы іс-қимыл жөніндегі 2024-2026 жылдарға арналған кешенді жоспар әзірленіп, бекітілді. Жастардың азаматтық белсенділігі Президент бастамаларын жүзеге асыруға атсалысуынан да байқалады.