Аудандық мәдениет үйінде бір жылға созылған «Ән қанатындағы Арал» республикалық жабық ән байқауының қорытынды гала-концерті өтіп, жеңімпаздар марапатталды.
Байқаудың басты мақсаты – ұлттық өнерді дәріптеу, Арал өңірінің тарихы мен табиғатын, туған жерге деген сүйіспеншілікті жаңа музыкалық шығармалар арқылы насихаттау. Шығармашылық жобаға еліміздің әр өңірінен кәсіби және әуесқой композиторлар мен ақындар қатысып, 40-тан астам жаңа ән ұсынылды.
Ұйымдастырушылардың айтуынша, байқауға жолданған туындыларда Арал өңірінің өткені мен бүгіні, болашағы мен тағдыры заманауи көркемдік тұрғыда бейнеленген. Бұл шығармалар туған өлкенің рухын, табиғатын және тарихи келбетін ән тілі арқылы кеңінен танытуға мүмкіндік берді.
Салтанатты кеште сөз сөйлеген ақын, Қазақстан Жазушылар және Журналистер одақтарының мүшесі, ҚР Ақпарат саласының үздігі Дүйсенбек Аяшұлы қатысушылар ұсынған шығармалардың мазмұндық тереңдігі мен көркемдік деңгейіне жоғары баға берді. Оның айтуынша, Аралдың болмысы мен қадір-қасиетін шебер жеткізген туындылар қазылар алқасының ерекше назарын аударған.
Кеш барысында өңірдің мәдени мұрасы насихатталып, жергілікті және республикалық деңгейдегі өнерпаздардың қатысуымен концерттік бағдарлама ұсынылды.
Бас жүлде композитор, ақын әрі әнші Елена Әбдіхалықованың «Ақ бесігім – Аралым» әніне берілді. Жеңімпазға арнайы диплом мен қаржылай сыйақыны аудан әкімі Аманжол Оңғарбаев табыстады.
Аудан әкімдігінің арнайы жүлдесі Үкітай Ерниязовтың «Аралым» шығармасына бұйырды. Арнайы марапат пен қаржылай сыйлықты аудан әкімі Аманжол Сақыпұлы тапсырды.
І орын – «Аралым махаббатым» әні (сөзі – Еркебұлан Кенехан, әні – Бекнұр Әбдіжәли).
ІІ орын – «Аралым» әні (әні – Нұрлыбек Аманов, сөзі – Ерқожа Тлепбергенов).
ІІІ орын – «Үмітті Аралым» әні (сөзі – Айдар Сайлауов, әні – Дінмұхаммед Шораев).
Гала-концерт барысында жүлдегер шығармалар жанды дауыста орындалып, көрермендердің ыстық ықыласына бөленді. Бас жүлде иегері Елена Әбдіхалықова жеңімпаз әнді өз орындауында шырқаса, әнші-сазгер Үкітай Ерниязов та өнер көрсетіп, кештің көркін қыздырды.
