Дональд Трамп Ормуз бұғазында кемелерді босатуға бағытталған операция басталатынын мәлімдеді.
АҚШ президентінің айтуынша, Таяу Шығыс уақытымен дүйсенбі күні таңертең Ормуз бұғазында «Project Freedom» («Бостандық жобасы») деп аталатын операция іске қосылады. Бұл қадам АҚШ пен Иран арасындағы қақтығыс салдарынан бұғазда тұрып қалған кемелерді қауіпсіз өткізуге бағытталған.
Трамптың сөзінше, «әлемнің көптеген елдері» өз кемелерін босатып беру жөнінде Вашингтоннан көмек сұраған. АҚШ тарапы олардың кемелерін қауіпсіз өткізіп, қалыпты қызметін жалғастыруына жағдай жасайтынын жеткізді.
Сонымен қатар, ол бұл операцияға кедергі келтірілген жағдайда АҚШ күш қолдануға дайын екенін ескертті.
АҚШ Қарулы күштерінің Орталық қолбасшылығы мәліметінше, операцияға басқарылатын зымырандары бар эсминецтер, 100-ден астам авиациялық техника, көпсалалы дрондар және шамамен 15 мың әскери қызметкер тартылады.
Операцияны АҚШ Мемлекеттік департаменті мен CENTCOM теңіздегі кеме қатынасы еркіндігін қамтамасыз ету коалициясы аясында үйлестіреді.
Айта кетейік, бұған дейін Bloomberg агенттігі Ормуз бұғазындағы кеме қозғалысы АҚШ-тың Иран ұсынған бейбіт жоспарды қабылдамауы және қақтығыстың қайта күшею қаупіне байланысты іс жүзінде тоқтағанын хабарлаған.
Сондай-ақ Al Jazeera мәліметінше, Иран қақтығысты реттеу үшін үш кезеңнен тұратын бейбіт жоспар ұсынған, онда алғашқы кезеңде 30 күн ішінде толық атысты тоқтату және өзара шабуыл жасамау туралы келісім қарастырылған.