«Америка мен Еуропада барлық әртіс пен продюсерлер әндерінің орындалғаны үшін ақы алады. Бізде, өкінішке қарай, бәрі тек қағаз жүзінде ғана жүзеге асты. Соның салдарынан әртістер мен продюсерлер шамамен 30 млрд теңге табыстан айырылған. Сондықтан біз бірыңғай ақпараттық жүйе құрдық. Мұнда ТВ мен радио бойынша барлық келісімшарт көрсетіледі. Ән қанша рет қойылса да, бәрі мобильді қосымшада көрінеді. Әр әртіс оны бақылап отыра алады. Жүйені қаңтарда іске қостық, ал алғашқы төлемдерді маусым-шілде айларында, тоқсан қорытындысы шыққаннан кейін күтіп отырмыз», – деді вице-министр.
Келесі жылы платформаның мүмкіндіктерін кеңейту жоспарланып отыр: теледидар мен радиодан бөлек, жүйе барлар, караоке және мейрамханаларды да қамтиды. Бұл музыкалық туындылардың кез келген қоғамдық орындарда орындалуын толық монетизациялауға мүмкіндік береді.
Жалпы, Бекболат Молдабековтың айтуынша, Әділет министрлігінің барлық ақпараттық жүйелері кезең-кезеңімен жасанды интеллект технологияларын енгізуді, ашықтықты арттыруды және қызмет көрсету уақытын қысқартуды көздейтін eGov 3.0 платформасына көшірілуде. Болашақта пайдаланушылар ведомствоның барлық қызметін eGov арқылы жасанды интеллектінің көмегімен алады.