Вице-министрдің айтуынша, мектептерді салу Ұлттық қордан бөлінген нысаналы трансферттер есебінен екі механизм арқылы жүзеге асырылды. Бірінші механизм – «Samruk-Kazyna Construction» АҚ бірыңғай операторы арқылы «кілтпен тапсыру» форматында орталықтандырылған құрылыс, оның аясында 208 мектеп салынды. Бұл тәсіл сапаның бірыңғай стандартын сақтауға, мерзімдерді орталықтандырылған бақылауға және сатып алу рәсімдерін оңтайландыруға мүмкіндік берді. Екінші механизм – жергілікті атқарушы органдардың жеке инвесторлар салған және белгіленген талаптарға сәйкес келетін дайын мектептерді сатып алуы. Бұл механизм бойынша 9 мектеп іске асырылды, оның ішінде 1 мектеп Астанада және 8 мектеп Алматыда.
Сондай-ақ спикердің айтуынша, Оқу-ағарту министрлігі ұлттық жобаның іске асырылуына жалпы бақылауды, оның ішінде үйлестіруді, мониторингті және әдістемелік сүйемелдеуді қамтамасыз етті. Ал, тікелей құрылыс жұмыстары Өнеркәсіп және құрылыс министрлігінің бақылауында болды. Жобаны іске асыруға шамамен 30 мемлекеттік орган мен ұйым, оның ішінде 20 өңірдің әкімдігі қатысты.
«Құрылыс барысында негізінен отандық өндірістің заманауи материалдары пайдаланылды. Осылайша жоба ұлттық экономика мен өңдеуші өнеркәсіптің дамуына мультипликативтік әсер етті. Барлық мектептер типтік жобалар бойынша салынып, сыйымдылығы 300-ден 2500 оқушы орнына дейінгі 7 санатқа біріздендірілді. Бұл құрылыс сапасына бірыңғай тәсілді қамтамасыз етуге, іске асыру мерзімдерін оңтайландыруға және бюджет қаражатын тиімді пайдалануға мүмкіндік берді», – деді Жайық Шарабасов.
Қосымша кепілдік міндеттемелер қарастырылған: ғимараттардың құрылыс-конструктивтік бөлігіне 5 жыл, ал жабдықтар мен жиһаздарға 3 жыл кепілдік мерзімі белгіленген. Бұл нысандардың сапасын және олардың кейінгі пайдаланылуын қамтамасыз етеді.
«Эргономикалық кеңістік – жаңа форматтағы мектептердің басты артықшылықтарының бірі. «Келешек мектептері» жобасындағы мектептердің ауданы бұрынғы типтік жобалармен салыстырғанда орта есеппен 15–20%-ға ұлғайтылған, ал техникалық жабдықталу деңгейі 4 еседен астам жоғары», – деп қосты вице-министр.