Өнер орталығының фойесінде Қызылорда облыстық филармониясы академиялық орындаушыларының қатысуымен романс кеші өтті. Сезім мен сырға толы бұл музыкалық кеш көрермендерді лирика мен әуездің ерекше әлеміне жетелеп, жан дүниені тербеген мәдени шараға айналды.
Кеш бағдарламасында қазақ және әлем классикасының таңдаулы романстары орындалып, көрермендер жоғары эстетикалық талғам мен таңдаулы музыкаларды тыңдауға мүмкіндік алды.
Сыр сен сазға толы кеште «Құрмет» орденінің иегері Самал Байсейтова, «Мәдениет саласының үздігі» төсбелгісінің иегері Мақсат Мақұлбеков, «Тұран» сыйлығының иегері Сымбат Тасбергенова, халықаралық және республикалық конкурстардың лауреаттары Мағжан Аманжолов, Ақылбек Табынбаев, Біржан Серік, Аружан Төреғали, Назерке Омар, Мирас Жантөре, Жаннұр Аманбай өнер көрсетті. Ерекше форматпен ерекшеленген шараны концертмейстерлер Айнаш Рысдаулетова мен Ольга Хегай сүйемелдесе, Халықаралық және республикалық конкурстардың лауреаты Асель Сейтжанова (скрипка) тыңдарманды тамаша өнерімен таңғалдырды.
Романстар кеші талғамы биік көрерменге академиялық орындаушылық мәдениеттің биік деңгейін танытып, ұлттық және әлемдік музыкалық мұраны тоғыстырған тағылымды кеш сыйлады.
