Кадрларды даярлау енді ЖОО, студент және аурухана арасындағы үшжақты шарттар жүйесі арқылы олардың болашақ жұмысқа орналасуымен тікелей байланысты – мұндай міндеттемелерді резиденттердің 70%-ы ресімдеген.
Жас мамандардың практикалық желіге жедел шығуы үшін терапия, педиатрия және хирургияны қоса алғанда, алты негізгі бағыт бойынша интернатура қалпына келтірілді.
Бұл шаралар ауылдық денсаулық сақтауды кадрлармен белсенді түрде толықтыруға мүмкіндік берді. Жергілікті жерлерде дәрігерлерді бекіту үшін мемлекет әлеуметтік қолдауды екі есеге арттырды: 2025 жылы тапшы мамандықтағы 529 дәрігер 8,5 млн теңгеден көтерме жәрдем алды. Жеңілдіктер мен қызметтік тұрғын үйді пайдаланған дәрігерлер санының жалпы өсуі 30%-ды құрады, бұл ауылдарға мыңнан астам маманның келуін қамтамасыз етті.
Министрлік қаржылық ынталандырумен қатар медициналық персоналды қорғау құралдарын енгізуде. ІІМ-мен бірлесіп медициналық мекемелерде полиция посттары орнатылады, ал жедел жәрдем фельдшерлері үшін бейнежетондар сатып алынады. Сонымен қатар, 190 мың қызметкерді қамтыған кәсіби жауапкершілікті сақтандыру институты дамып келеді, оның қызметі қазір 3,1 млрд теңге көлемінде сақтандыру қорымен қорғалған.
Кешенді шаралардың нәтижесінде Қазақстанда дәрігерлердің жалпы тапшылығы 19,6%-ға, ал ауылдық жерлерде 26,7%-ға төмендеді.