Бүгін аудан әкімі Алмасбек Есмаханов облыс әкімі Нұрлыбек Нәлібаевтың тапсырмасына сәйкес аудан аумағында соңғы жылдары пайдалануға берілген әлеуметтік нысандарды аралап, олардың қазіргі жай-күйі мен ғимараттардың сапасына зерделеу жүргізді.
Қазалы ауданында соңғы төрт жылдың ішінде барлығы 14 әлеуметтік нысан халық игілігіне берілген. Олардың қатарында спорт кешендері, дәрігерлік амбулаториялар, мәдениет үйлері, мектептер мен балабақшалар бар. Сонымен қатар, қазіргі таңда аудандағы Әйтеке би кенті мен Қожабақы ауылында 2 жаңа спорт кешенінің құрылысы қарқынды жүргізілуде.
Аудан әкімі нысандарды аралау барысында Жанқожа батыр, Бекарыстан би, Майдакөл, Түктібаев ауылдарындағы бірқатар әлеуметтік нысандарды аралап, ғимараттардың ішкі-сыртқы жағдайын, инженерлік желілерінің жұмысын, жылу, жарық, санитарлық талаптардың сақталуын да жеке бақылап шықты.
Зерделеу барысында анықталған бірқатар кемшіліктерге байланысты әлеуметтік нысандардың құрылысын жүргізген мердігер мекемелердің басшыларына барлық ақауларды белгіленген кепілдік міндеттемелер шеңберінде толық қалпына келтіруді ескертті. Сонымен қатар, мекеме басшыларына ғимараттарды күтіп-ұстау, абаттандыру және санитарлық тазалықты сақтау мәселесіне ерекше назар аудару қажеттігін қатаң тапсырды.
Сондай-ақ, пайдалануға берілген нысандардың тек сыртқы келбеті ғана емес, ең алдымен қауіпсіздігі мен қолайлылығы басты назарда болуы тиіс екенін атап өтіп, тұрғындарға сапалы қызмет көрсетуге барлық жағдай жасалуы керектігін жеткізді.
Аталған жұмыстарды жүйелі түрде бақылауға алу аудан әкімінің жауапты орынбасарына жүктеліп, анықталған кемшіліктерді шұғыл түрде, бір апта мерзімде толық қалпына келтіру туралы нақты тапсырма берілді.
Аудан басшысы аталған мәселелер аймақ басшысының тікелей бақылауында екенін жеткізіп, алдағы уақытта да әлеуметтік нысандардың сапасы мен тиімді пайдаланылуы тұрақты бақылауда болатынын айтты.
