Қызылордада «Заң мен тәртіп» қағидаты аясындағы «Қылмыссыз өңір – кемел келешек кепілі» жобасы шеңберінде кездесулер ұйымдастырылып жатыр. Соның аясында Жалағаш ауданындағы «Руханият орталығында» 14 ауылдық округтегі дүкен иелерімен кездесу өтті.
Аудандық прокуратура бастамасымен өткен жиын «Қылмыссыз өңір – алкогольсіз ауылдан басталады» тақырыбында өтті. Былтыр аудандағы Таң және Еңбек ауылдары алкогольсіз ауыл болып бастама көтеріп, басқаларға үлгі болып отыр.
Ал Қазалы ауданының полиция бөлімі Құмжиек ауылдық округінде «Алкогольсіз ауыл» жобасы аясында учаскелік полиция инспекторы мен ауылдық округі әкімі аппараты мамандары ауыл тұрғындарынан сауалнама алып, дүкен иелеріне түсіндірме жұмыстарын жүргізді.