Оның хабарлауынша, ағымдағы жылы мемлекеттік грант иегерлер саны өткен жылмен салыстырғанда 9%-ға өсті.
«Биыл өңірімізде алғаш рет «Табысты мектеп» конкурсы өткізілді. Оның мақсаты – өңірдегі білім сапасын арттыру және педагогикалық ұжымды ынталандыру. Конкурс нәтижесінде мектептің барлық қызметкерлері кіші қызметкерден бастап мектеп директорына дейін қаржылай сыйақы алды. Ағымдағы жылы Астана қаласында ауыл оқушыларына арналған пәндік олимпиаданың жаратылыстану-математикалық бағытына 38 оқушы қатысып, командалық бас жүлдені жеңіп алды. Жаңаөзен қаласында 350 орындық оқушыларға арналған озық үлгідегі болашақ сарайының құрылысы аяқталды, нысан берілуге дайын», – деді Маңғыстау әкімі.
Өңірде ерекше балаларды қолдау мәселесі өзекті. Оларға жағдай жасау мақсатында мемлекеттік жекешелік әріптестік механизмі арқылы облыста 2 балабақша салу бойынша жұмыстары басталып, құрылысы 2027 жылы аяқталады. Бейнеу ауылында алғаш рет ерекше күтімді қажет ететін балаларға арналған оңалту орталығы ашылды. 2026 жылы кәмелет жасына толмаған балаларға арналған 100 орындық орталық өз жұмысын бастайды.
Әкім денсаулық сақтау саласындаңы жетістіктермен де бөлісті. Мәселен, Мұнайлы ауданында 150 төсек орындық аурухана салынып, іске қосылды. Жаңа аурухана 173 мыңнан астам жергілікті тұрғынды сапалы медициналық қызметпен қамтамасыз етуде. 3 алғашқы медициналық санитарлық көмек көрсету нысандары іске қосылды. Позитронды эмиссиялық томография (ПЭТ) орталығы ашылды. Орталық онкологиялық ауруларды ерте кезеңде анықтау және тиімді емдеу жүйесінің маңызды буынына айналатын болады. Осы зерттеуден өту үшін бұрын облыстан жыл сайын 1 мыңға жуық тұрғын Астана мен Алматыға кетсе, қазір оны Ақтау қаласында өткізе алады. Келесі жылға 2000-нан аса зерттеулер жоспарланған, көрші облыстардың азаматтарын да қабылдауға мүмкіндік болады.
Ақтау қаласында жедел жәрдем станциясының құрылысы аяқталды. Станцияға 34 жаңа жедел жәрдем автокөлігі мен аудандық ауруханаларға 18 дана жаңа арнайы санитарлық автокөліктер табысталды.
Саладағы негізгі мәселенің бірі кадр тапшылығын шешу үшін биыл медицина саласына 164 грант бөлінді, 195 дәрігерге 1,2 млрд теңге сомасында біржолғы әлеуметтік көмек көрсетілді, 21 қызметтік пәтер сатып алынды және шетелге оқуға 20 маман жіберілді.
Соңғы екі жылда спорт саласында 9 мемлекеттік мекеме құрылды. Ағымдағы жылы бірқатар спорттық нысан пайдалануға беріліп, 14 спорттық мекемеге күрделі және ағымдағы жөндеу жұмыстары жүргізілді. Спорт мектептеріне 4 жеңіл автокөлік, 20 микроавтобус табысталды.
Мәдениет саласында есепті кезеңде 6,5 мыңнан астам мәдени шара ұйымдастырылды. 15 мәдениет нысандарына ағымдағы және күрделі жөндеу жұмыстары жүргізілді, қызмет бабында пайдалану үшін 11 арнайы автокөліктер сатып алынды.
«Таза Қазақстан» республикалық экологиялық науқаны аясында жыл басынан бері 130 мың адам қатысты, 32 мыңнан астам ағаш түптері отырғызылды, арнайы техникалар табысталуда. Сонымен қатар ауылдық елді мекендердің арасында «Үлгілі ауыл» байқауы өткізілді.