Биыл Қызылорда полицейлері есірткіні заңсыз жарнамалау бағытында прокуратура органдарымен бірлесіп қылмыстық істер шеңберінде екінші деңгейлі банктердегі 1100 есепшоттан жалпы сомасы 90 миллион теңгені бұғаттауға қойды.
Жеке құрам есіткімен күресті үздіксіз жүргізіп келеді. «Киберқадағалау» ақпараттық жүйесіне синтетикалық есірткіні жарнамалайтын 1500 сайт енгізіліп, бұғатталған. Прокуратура органдарының қызметкерлері «Amanat» партиясының өкілдерімен бірлесіп, облыс орталығынан есірткі жарнамасы бар 100 граффити жазуларды жойды.
Жақында қаладағы көпқабатты үйлердің бірінің қабырғасына граффити жазуларын жарнамалап жүрген тұрғын ұсталып, Қызылорда қалалық Полиция басқармасының уақытша ұстау абақтысына қамалды. Қазір оған қатысты Қазақстан Республикасының Қылмыстық Кодексінің 299-1 бабының 1-бөлігімен сотқа дейінгі тергеп-тексеру әрекеттері жүргізіліп жатыр.
Халықтың нашақорлыққа қарсы иммунитетін қалыптастыру мақсатында жергілікті бюджеттен 2025 жылға 17 млн теңге қаражат бөлінген. 102 мыңнан астам жасөспірім, олардың ата-аналары мен оқытушыларының қатысуымен 1032 іс-шара өткізілді.
Мұрат ЖЕТПІСБАЕВ