Қаламызда Облыстық жастар орталығының ғимаратында Қызылорда қалалық «Мансап орталығы» филиалымен бірлесіп, жұмыс іздеп жүрген барлық азаматтарға арналған «Жұмысшы мамандықтар жылы» аясындағы «Болашаққа бағдар» атты «Ашық есік күні» және «Бос жұмыс орындары» жәрмеңкесі ұйымдастырылды.
Іс-шараға құрылыс саласының жұмысшылары, бетон құюшылар, тас қалаушылар, түрлі санаттағы көлік жүргізушілері, электриктер, күзетшілер, сондай-ақ білім саласы бойынша мұғалімдер мен тәрбиешілер, медицина қызметкерлері, есепшілер және басқа да мамандық иелері қатысып, тұрақты жұмысқа орналасу мүмкіндігіне ие болды.
Жәрмеңке жұмыссыз азаматтарға жұмыс берушілермен тікелей байланысып, сұхбаттасуға толық мүмкіндік берді.
Шараға барлығы 17 жұмыс беруші мекеме қатысып, 142 бос жұмыс орны ұсынылды.
Іс-шараға 150-ден астам жұмыс іздеуші азамат, оның ішінде 75 әйел, сондай-ақ 112-сі 18-35 жас арасындағы жастар қатысты. Консультация алғандардың жалпы саны – 138 азамат.
Сонымен қатар жәрмеңкенің ерекшелігі ретінде 21 оқу орнының 300 ге жуық бітіруші түлектері де қатысып, жұмыс берушілермен тікелей сұхбаттасу мүмкіндігіне ие болды.
Жәрмеңке нәтижесінде 19 азаматқа жолдама беріліп, олар тұрақты жұмысқа орналастырылды.
Бұдан бөлек, субсидияланатын жұмыс орындары аясында жұмыс берушілер «Жастар тәжірибесі» бағдарламасы бойынша оқу бітіргеніне 5 жылдан аспаған жас мамандарды уақытша жұмыс орындарына қабылдайды.
Бүгінгі күнге дейін жұмыспен қамтудың белсенді шараларына жолданғандар:
Жастар тәжірибесі – 1179 адам;
Әлеуметтік жұмыс орындары – 100 адам;
Күміс жас жобасы – 480 адам;
Қоғамдық жұмыстар – 2920 адам.
Өңірде жұмыссыздық деңгейін төмендетудің тиімді тетіктерінің бірі – бос жұмыс орындары жәрмеңкесін тұрақты өткізу болып табылады.
Алдағы уақытта «Бос жұмыс орындары» жәрмеңкесі Қызылорда қаласының барлық тұрғындары мен техникалық және кәсіптік білім беру ұйымдарының бітіруші түлектері үшін ай сайын тұрақты түрде ұйымдастырылатындығын хабарлаймыз.
