Күн санап аумағы артқан мегаполистің экологиялық ахуалы табиғат жанашырларын көптен алаңдатып жүрген мәселе. Қалада ауа сапасын жақсарту мен қоршаған ортаға зиянды әсерді азайту бағытында кешенді жұмыстар қолға алынған.
Өңірлік коммуникациялар қызметі алаңында журналистермен жүздескен Алматы қаласы Экология департаментінің басшысы Дінмұхамед Лесбеков ауа сапасын жақтартуға бағытталған бастамалар жайлы мәлімдеді.
Оның айтуынша, қазіргі уақытта қалада төрт негізгі бағыт бойынша жұмыс жүріп жатыр: жылу электр орталықтарын жаңарту, жеке тұрғын үйлерді газбен қамту, көлік шығарындыларын азайту және ауаның сапасын автоматты бақылау жүйесін енгізу.
«Экологиялық жағдайды жақсарту – біздің басты мақсатымыз. Бұл бағыттағы шаралар қала тұрғындарының өмір сапасына тікелей әсер етеді», – дейді маман.
Қаланың энергетикалық инфрақұрылымын жаңарту экологиялық жағдайға тікелей ықпал ететіні белгілі. 2017 жылы ЖЭО-1 толық газға ауыстырылған болатын, бүгінде ЖЭО-2-де кең көлемді жаңғырту жұмыстары жүріп жатыр. 2022–2026 жылдарға арналған жоба аяқталған соң, жыл сайынғы зиянды шығарындылар көлемі 37,1 мың тоннадан 2,7 мың тоннаға дейін қысқармақ.
Жауаптылардың сөзіне сенсек, газдандыру деңгейі – 99,4 пайызға орындалған. Қалалық газ желілерінің ұзындығы 6 мың шақырымнан асады, соңғы жылдары тағы 24 шақырым жаңа желі тартылған.
Алматыда 706 мыңнан астам көлік тіркелген. Бұдан бөлек, күн сайын қалаға шамамен 400 мыңға жуық сырттан келген көліктер қатынайды. Бұл ауа сапасына елеулі әсер етеді.
Қаладағы 19 экологиялық бекетте полиция және экология қызметкерлері бірлесіп тексеріс жүргізеді. Биылғы 9 айда 18 мыңнан астам құқық бұзушылық анықталып, жалпы сомасы 355 миллион теңгеден астам айыппұл салынған.
— Кей көліктер әлі де ауаны ластап жатыр. Мұндай жағдайды болдырмау үшін көлік иелері техникалық қызметке дер кезінде жүгінгені жөн. Таза ауа – бәріміздің ортақ жауапкершілігіміз.
Ауаны қорғаудың жаңа ережелері әзірленіп жатыр. Құжатта шығарындыларды бақылау, зиянды заттардың мөлшерін азайту, төмен ластану аймақтарын құру және ауа сапасын үздіксіз қадағалау қарастырылған,- дейді Д. Лесбеков.
Арман ОКТЯБРЬ