Израиль әскері Газадағы ең ірі қалаға шабуыл жасауға дайындалып, бейбіт тұрғындарға үйлерін тастап шығуды талап етті. Халықаралық қауымдастық болса, бұл жағдайдың гуманитарлық апатқа ұласу қаупі бар екенін ескерткен.
Израильдің Қорғаныс армиясы (ЦАХАЛ) сейсенбі күні, 9 қыркүйекте, Газада тұратын халыққа арнап жедел эвакуация туралы үндеу жариялады. Әскерилердің дерегінше, қалада шамамен 1 миллион палестиналық бар.
Израиль премьер-министрі Биньямин Нетаньяху алдағы құрлық операциясына дайындықты жариялап: «Сіздерге ескертілді – қазір кетіңіздер», – деп мәлімдеді. Ол Газа қаласын ХАМАС қозғалысының соңғы тірегі деп атады.
Өткен демалыс күндері ЦАХАЛ тұрғындарға анклавтың оңтүстігіндегі «қауіпсіз аймаққа» көшуге кеңес беріп, онда азық-түлік, медициналық көмек пен уақытша баспана қамтамасыз етілетінін жеткізген. Алайда халықаралық ұйымдар блокада жағдайында жаппай көшу мүмкін емес екенін айтып, гуманитарлық апат қаупі жоғары екенін алға тартты.
Айта кетейік, ХАМАС пен Израиль арасындағы қақтығыс 2023 жылғы 7 қазанда басталды. Сол күні ХАМАС содырлары Израильге жаппай зымыран атқылап, ел аумағына басып кірді. Бұл заманауи Израиль тарихындағы бейбіт халыққа қарсы ең қанды шабуыл болды: шамамен 1200 адам қаза тапты. Сонымен бірге 250-ден астам адам тұтқынға алынып, Газада ұсталды. Кейбірі кейін айырбасталды немесе босатылды, бірақ біразы қаза тапты.
Жауап ретінде Израиль ХАМАС-қа соғыс жариялады. Содан бері әуе шабуылдары мен құрлық операциялары нәтижесінде, ХАМАС бақылауындағы денсаулық сақтау министрлігінің дерегіне сай, 64 мыңнан астам палестиналық қаза тауып, 162 мыңнан астамы жараланған.