Непал премьер-министрі Шарма Оли елдегі жаппай наразылықтар мен тәртіпсіздіктердің салдарынан отставкаға кетті.
Шарма Оли 2024 жылдың шілдесінен бері үкіметті басқарған еді. БАҚ дерегінше, оның ізінше оппозициялық Ұлттық-демократиялық партиясының мүшелері де өз өкілеттігін тоқтатты.
Наразылықтардың өршуі
Сейсенбі күні наразылыққа шыққан демонстранттар Катмандудағы үкімет кешеніне баса-көктеп кіріп, парламент ғимаратын, билеуші «Непал конгресі» партиясының орталық кеңсесін және премьер-министрдің резиденциясын өртеді.
Непал армиясы үкімет мүшелерін тікұшақ арқылы эвакуациялауға мәжбүр болды. Катмандудағы халықаралық әуежай уақытша жабылып, барлық рейстер тоқтатылды.
Жастар көтерілісінің себебі
Дағдарыстың негізгі себебі — биліктің Meta, YouTube, X, Reddit және LinkedIn сияқты бірқатар әлеуметтік желілердің жұмысын тоқтатуы. Себебі бұл платформалар елдің Байланыс және ақпараттық технологиялар министрлігінде тіркелмеген.
Бұл шешім қоғамда, әсіресе жастар арасында үлкен наразылық туғызды. 8 қыркүйектен бастап Катманду мен өзге де қалаларда «Z буынының революциясы» аталған жаппай шерулер басталды. Қақтығыстар кезінде 19 адам қаза тауып, 300-ден астамы жараланды.
Сейсенбі күні билік әлеуметтік желілерге салынған тыйымды алып тастап, арнайы комитет құрылғанын мәлімдеді. Ол 15 күн ішінде орын алған оқиғаларды зерттеп, жаңа толқулардың алдын алу үшін ұсыныстар дайындауы тиіс.