Мемлекет басшысының бастамасымен жүзеге асырылып жатқан «Таза Қазақстан» экологиялық жобасы аясында Қызылорда облысының Жаңақорған ауданында экологиялық жағдайды жақсарту, халыққа жайлы өмір сүру ортасын қалыптастыру және заманауи демалыс инфрақұрылымын дамыту бағытында ауқымды жұмыстар жүргізілуде.
ЖАҢАРҒАН ЖЕҢІС САЯБАҒЫ
Аудан орталығында Ұлы Жеңістің 80 жылдық мерейтойына орай «Жеңіс саябағы» ашылып, бүгінде бұл орын жаңақорғандықтардың патриоттық-мәдени іс-шаралар өткізетін алаңына айналды. Жобаның жалпы құны — 25 миллион теңге. Қаржыландыру толықтай жергілікті бюджет есебінен жүзеге асырылды. Саябақ аумағы толық абаттандырылып, көркейту жұмыстары жүргізілді. Әскери танк үлгісі орнатылып, жасыл желектер мен сәндік гүлзарлар, демалыс орындықтары орналастырылды.
ЖАҢАҚОРҒАН ТЕМІРЖОЛ ВОКЗАЛЫ ЖАҢАРУДА
Биыл мамыр айында Жаңақорған теміржол вокзалына «Қазақстан Темір Жолы» ҰК» АҚ қаржыландыруымен күрделі жөндеу жұмыстары басталды. Жоба аясында ғимарат іргетасы мен қабырғалары нығайтылып, шатыр, есік-терезелер толық жаңартылып, жолаушыларға арналған күту залдары заманауи стандарттарға сай жабдықталады. Мүмкіндігі шектеулі жандарға арналған қолжетімділік элементтері мен қауіпсіздік жүйелері орнатылады. Сонымен қатар, вокзал маңын көгалдандыру және брусчатка төсеу жұмыстары да қарастырылған. Қазіргі таңда жөндеу жұмыстарының басым бөлігі аяқталуға жақын.
ТЕМІР ЖОЛ АСТЫ ӨТКЕЛІ ЖАҢА КЕЙІПКЕ ЕНДІ
Жаңақорған кентінің көркін ашатын тағы бір жаңа нысан – А.Иманов пен Хорасан Ата көшелерінің қиылысындағы темір жол асты өткелі жаңартылып, халық игілігіне берілді. Аталған нысанды «Аңсар строй» ЖШС-і өз бастамасымен және демеушілік қолдау есебінен жаңғыртты. Өткелдің қабырғалары сапалы гранитпен қапталып, сәулеттік жағынан көрікті келбетке ие болды. Сонымен қатар, өткел маңынан «I LOVE JANAQORGAN» аллеясы заманауи жарықтандыру жүйесімен орнатылды. Бүгінде бұл аллея кешкі мезгілде жастардың, тұрғындардың жиі келетін демалыс орнына айналып, фотогенді орын ретінде танымал болуда.
«ТАЗА ҚАЗАҚСТАН»: ЖАҢАҚОРҒАНДА 35 МЫҢҒА ЖУЫҚ ЕРІКТІ ТАЗАЛЫҚ АКЦИЯЛАРЫНА ҚАТЫСТЫ
«Таза Қазақстан» республикалық экологиялық тұжырымдамасы аясында ауданның барлық елді мекендерінде санитарлық тазарту, абаттандыру және көркейту-көгалдандыру жұмыстары жүргізілуде. Бүгінгі күнге тазалық шараларына барлығы 34 100 ден аса еріктілер, қоғам қайраткерлері, бюджет саласы мен кәсіпорын қызметкерлері қатысты.
Нәтижесімен 464 тоннаға жуық қоқыс қалдықтары шығарылып, елді мекендердегі 30 скверлер мен парктер, 7 тарихи-мәдени ескерткіштер, 145 әлеуметтік нысандар (мектептер, бала-бақшалар, спорт, денсаулық сақтау және т.б.), 17 өнеркәсіп және бизнес нысандары, 110 су объектілері (өзендер, көлдер, жасанды су айдындары, субұрқақтар, арықтар және т.б) мен 400 астам көшелердің бойы (көп қабатты үйлер мен жер үйлердің аулалары) тазартылды. Оған 233-тен аса техника жұмылдырылды. Жыл басынан аудан бойынша 37 300 дана өңірдің климатына сәйкес жерсінетін қарағаш, терек, клен және сырталының көшеттері отырғызылды.