Шиелі ауданы әкімі Айтбай Жандарбеков кент аумағындағы бірқатар әлеуметтік нысандар мен инфрақұрылымдық жобалардың барысын бақылады.
Алдымен аудан басшысы Яссауи және Есабыз көшелері бойындағы көпқабатты тұрғын үйлердің шатырларын жөндеу жұмыстарымен танысып, тұрғындармен пікірлесті. Жергілікті тұрғындар атқарылып жатқан істерге ризашылығын білдірді. Бұл жұмыстарды «Ақбозат LTD» ЖШС жүзеге асыруда.
Келесі кезекте әкім Шиелі кенті Жайлыбаев, Жүргенов көшелеріндегі автомобиль жолдарының күрделі жөндеу жұмыстарын көрді. Мұнда жаңа асфальт төселіп, аялдамалар және жаяу жүргіншілер жолы мен көше жарықтары орнатылуда. Сондай-ақ тұрғындардың сұранысына сәйкес, алдағы уақытта кент орталығындағы Д.Смайылов көшесіне де бұл жұмыстар жүргізілмек.
Сонымен қатар аудандық аурухана алдындағы автотұрақ кеңейтіліп, халыққа қолайлы жағдай жасалуда. Аталған жұмыстарды «Ақнұр-Авто» ЖШС жүргізіп келеді.
Аудан басшысы сапаны басты назарда ұстап, жұмыстардың уақытылы әрі тұрғындарға ыңғайлы деңгейде атқарылуын тапсырды.
