Іс-шара Махамбет Өтемісұлы атындағы Оқушылар сарайының алдындағы алаңда өтті. Акция барысында қаладағы жекеменшік қосымша білім беру ұйымдарының 150-ге тарта жас суретшісі бір мезетте Абайдың өмірі, шығармашылығы, табиғат лирикасы, қара сөздері мен рухани мұрасынан шабыт алып, қиялдарын шыңдады. Балалар өз туындылары арқылы Абай әлемін шығармашылық тұрғыдан бейнелеп, оның ұлт руханиятындағы орны мен тағылымын сурет өнері арқылы жеткізе білді.
Акция қорытындысы бойынша «Абай әлемі балалар көзімен» көркемсурет акциясына қатысушылардың үздік туындылары көпшілік назарына ұсынылады. Іс-шара жас суретшілердің шығармашылық әлеуетін танытып қана қоймай, ұлы ақын Абай Құнанбайұлының әдеби және рухани мұрасын бейнелеу өнері арқылы насихаттауға мүмкіндік береді.
Көркемсурет акциясы балалардың шығармашылық әлеуетін ашуға, көркемдік талғамын қалыптастыруға, ұлттық құндылықтарға деген құрметін нығайтуға, «Адал азамат» біртұтас тәрбие бағдарламасының құндылықтарын дәріптеуге және жас дарындарды қолдауға бағытталған маңызды мәдени-білім беру бастамаларының бірі болып саналады.