Қазақстанның жаңа Конституциясын қабылдау бойынша референдум кезінде 54 елде орналасқан 71 референдум учаскесі жұмыс істейді. Бұл туралы ҚР сыртқы істер министрінің орынбасары Арман Исетов «Референдум – 2026» онлайн марафонында хабарлады.
Оның айтуынша, шетелдегі дауыс беретін қазақстандықтардың жалпы саны – 14380 адам.
«Референдум учаскелерінде дауыс беру Астана уақытымен таңғы сағат 3.00-де Токио және Сеул қалаларында басталды. 9.00-ге дейін жалпы 34 референдум учаскесі ашылып, оларға келіп дауыс бергендер саны 350 адамды құрады. Ең соңғы ашылып-жабылатын референдум учаскесі АҚШ-тағы Сан-Франциско қаласында орналасқан. Ол бүгін сағат 19.00-де ашылады және 16 наурыз күні сағат 8.00-де жабылады. Сондай-ақ 14-16 наурыз аралығында Алматы және Астана қалаларында Халықаралық байқаушылар және шетелдік БАҚ-қа ықпалдасу орталығы жұмыс істейді. 15-16 наурызда Орталық алаңдарында халықаралық байқаушылар қатысуымен 15 брифинг өткізілмек», – деді спикер.