1986 жылғы Желтоқсан көтерілісі – қазақ халқының жаңғыру жолындағы ең аңызға толы, ең ауыр әрі ең асқақ беттердің бірі. Бұл оқиға ұлт намысын оятқан, тәуелсіздікке бастар ұлы жолдың алғашқы қадамдарының бірі болғаны тарихтан белгілі. Желтоқсанның қақаған аязына қарамай, алаңға шыққан жастар әділетсіздікке қарсы бас көтеріп, ел еркіндігі үшін күресті. Олар отаншылдықтың, қайсарлықтың үлгісін көрсетті. Сол күндердің жалыны бүгінде жаңа буынның бойында ұлтқа деген сүйіспеншілік болып жалғасып келеді.
Осы мақсатта биыл Алматы қаласы Ішкі саясат басқармасының қолдауымен Алматы қаласының 5 оқу орнында Желтоқсан көтерілісіне қатысқан ардагерлермен тағылымды кездесулер ұйымдастырылды. Кездесулердің басты мақсаты — тарихты тек кітаптан емес, сол сәттердің куәгерлері мен қатысушыларынан тыңдап, олардың жүректен шыққан шынайы әңгімелері арқылы ұрпақ бойына патриоттық сезім ұялату.
Кездесу кештері Алматы қаржы-экономикалық колледжі, Л.Б.Гончаров атындағы Қазақ автомобиль-жол институты, Шет тілдер педагогикалық колледжі, Алматы заң колледжі, Еуразиялық техникалық колледжінде өтті.
Әр оқу орнында өткен шаралар мазмұнға бай, тарихи тағылымға толы болды. Студенттер Желтоқсан күндерінің шынайы бет-бейнесін бұрынғыдан да терең түсініп, еркіндікке оңай қол жетпегенін жүректерімен сезінді. Кездесуге Жүрсін Тастекеев, Несіпкүл Шөкей, Бегежанов Нұридин, Шора Қарабаев, Майгүл Алтынбекова, Болат Құрымбаев, Нұргүл Сақпанова, Аманғазы Кәріпжанәулеті, Мейіргүл Қазыбаева, Нұржамал Әшімхан секілді ел құрметіне бөленген азаматтар қатысты.
Қонақтар сол бір желтоқсан күндеріндегі оқиғаларды, алаңдағы қиындықтарды, студенттердің бір-бірін демеп, намыс пен рухқа сүйенген күресін тебірене еске алды. Әрқайсысының тағдыры – бір-бір деректі хикая, бір-бір өмірлік сабақ.
Желтоқсан қаһармандарының ерлігі – ұрпақ жадында.
«Social project management» орталығы