Абай облысының әкімі Берік Уәлидің төрағалығымен өткен кеңейтілген аппараттық кеңесте 2024 жылғы мақсат индикаторларының орындалуы, 2025 жылғы облыс даму бюджетінің III тоқсан қорытындысы, «Мемлекеттік органдардың ашықтығы» және «Мемлекеттік қызметтер сапасын операциялық бағалау» мәселелері қаралды.
Жиынға облыстық басқарма басшылары мен өңірлік департамент жетекшілері қатысып, аудан және қала әкімдері бейнережимде қосылды. Күн тәртібіндегі мәселелер бойынша облыс әкімі аппаратының мемлекеттік қызметтерді мониторингілеу бөлімінің басшысы Айжан Ысқақова, цифрлық технологиялар басқармасының басшысы Абзал Серікұлы және қаржы басқармасының басшысы Гүлфайрус Серікболова баяндама жасады.
Кеңесте мемлекеттік басқару тиімділігі мен ашықтықты күшейту бағытындағы жүйелі жұмыс атап өтілді: әкімдік қызметі кешенді түрде бағаланып, даму жоспарының орындалуы мен әлеуметтік көрсеткіштердің өсуі тұрақты бақылауда. Инфрақұрылымды дамыту, инвестиция тарту және әлеуметтік саланы жетілдіру өңірдің негізгі басымдықтары ретінде белгіленді.
«Ашық бюджет» және «Ашық диалог» бағыттары бойынша мониторинг үздіксіз жүргізілуде. Биыл өңірде 185 әлеуметтік және инфрақұрылымдық нысанның құрылысы жүріп жатыр, бөлінген қаржының мақсатты әрі уақтылы игерілуі әкімдіктің бақылауында.
Қорытынды сөзінде аймақ басшысы қала-аудан әкімдері мен басқармаларға бюджет қаражатын жоспарлау мен игеру тәртібін қатаң сақтап, даму жоспары шеңберіндегі жобаларды мерзімінде және сапалы орындауды, сондай-ақ құрылыс нысандарын уақытында аяқтауды тапсырды.
Ақпарат: Semeytany.kz алынды