Семей қаласында биыл абаттандыруға жоспарланған 35 ауладың 30-ындағы жұмыстар аяқталды. Облыс әкімі Берік Уәли қала бойынша жүргізіліп жатқан абаттандыру барысын қарап, Первомайский және Достоевский көшелеріндегі аулаларда болды.
Жоба аясында жасанды жабындысы бар футбол алаңы, балалар ойын алаңы, демалыс аймақтары, жаяу жүргіншілерге арналған жолдар және шағын сәулет нысандары салынған. Аталған екі аула «Халық қатысатын бюджет» жобасы бойынша абаттандырылған 9 ауланың қатарында.
Қала тұрғыны Дәмежан Ғұбайдуллина аулалардың жаңа келбеті әсіресе балалар үшін қуанышты жаңалық болғанын айтты. Оның сөзінше, аула бұрынғы күйімен салыстырғанда түбегейлі өзгерген.
Аймақ басшысы абаттандыру жұмыстарының келесі жылы да жалғасатынын атап өтті: тұрғындарға жаңа құрылған нысандарды күтіп ұстауды сұрап, қаладағы тағы бірнеше аулаға жөндеу жоспарланып отырғанын жеткізді.
