Бүгін аудан әкімі Айтбай Жандарбеков мәжіліс залында білім саласының ардагерлерін арнайы қабылдап, құрмет көрсетті.
«Азаматын ардақтаған ел азбайды» деген халық даналығын негізге алған аудан басшысы ардагер ұстаздардың еңбегін ерекше атап өтті.
Аудан әкімі өз сөзінде батыр Бауыржан Момышұлының «Ұстаздық – ұлы құрмет. Себебі, ұрпақтарды ұстаз тәрбиелейді. Болашақтың басшысын да, данасын да, ғалымын да, еңбекқор егіншісін де, кеншісін де ұстаз өсіреді» деген ұлағатты сөзін мысалға келтіріп, ұстаздық еңбектің қадір-қасиетіне тоқталды.
Ардагер ұстаздар еңбегі бағаланды
Жиын барысында сала ардагерлері мен жетекшілеріне Құрмет грамоталары, сондай-ақ облыс және аудан әкімінің Алғыс хаттары табысталды.
Олардың ішінде:
Тұрысбеков Сейітхан Тұрысбекұлы – 40 жылға жуық ғұмырын білім саласына арнап, бірнеше буын шәкірт тәрбиелеген, 10 жылдан астам уақыт №149 Ә.Монтаев атындағы мектептің директоры қызметін атқарған ардагер ұстаз.
Сыздықова Жақсыгүл – ағылшын тілі пәнінің тәжірибелі маманы, №47 М.В.Ломоносов атындағы мектеп-лицейінде жас ұрпаққа сапалы білім, өнегелі тәрбие берген ұстаз.
Кісенбаева Зияхан Бәкірқызы – №152 орта мектептің математика пәнінің ардагер ұстазы, саналы ғұмырын жас ұрпақтың білімге құштарлығын арттыруға арнаған ұстаз.
Найзабекова Баян Бектұрсынқызы – №127 мектеп-лицейінің бастауыш сынып ардагер ұстазы, бірнеше буын бүлдіршінді сауат ашып, тәрбиелеуде қажырлы еңбек еткен ұстаз.
Сонымен қатар, аудандық ардагерлер кеңесінің төрағасы Өркен Исмайл мен аудандық қоғамдық кеңес төрағасы Қаблеш Бекіш ардагер ұстаздарға ыстық ықыласын білдірді.
Бұл басқосу – ұстаздарға деген құрметтің ғана емес, жас ұрпаққа үлгі-өнеге көрсетудің жарқын белгісі. Ардагерлердің ақ батасы мен өмірлік тәжірибесі – болашаққа бағдар, өскелең ұрпақ үшін үлкен мектеп.
