Қаламызда халықаралық жастар күніне орай, «Qyzylorda Jastar Fest» мерекелік гала-концерті өтті.
Мерекелік кеш шығыс жастарының жалынды жетекшісі болған Ғани Мұратбаев ескерткішіне тағзым гүлін қою рәсімімен бастау алды. Бұл – тарихқа тағзым, ұрпаққа өнеге, алға жетелейтін ұлы мұраттарды дәріптеудің айқын белгісі.
Әрі қарай шара спорттық сайыстармен жалғасып, белсенді жастар өз күш-қайратын, ептілігін ортаға салды. Әсіресе, қала жастарының ынта-жігерімен өткен спорттық жарыстар олардың ұйымшылдығын, салауатты өмір салтын ұстануға деген құлшынысын көрсетіп берді.
Кештің ең әсерлі бөлігі – концерттік бағдарлама болды. Аймақтың белгілі әншілері мен би топтары сахнаға шығып, көрермен қауымға шаттық пен қуаныш сыйлап,. заманауи әуендер мен ұлттық нақыштағы әндер үйлесім тауып, көрерменді бір сәтте ерекше атмосфераға бөлеген концертте Қызылорданың жас өнерпаздары өз дарындарын паш етіп, Сыр өңірінің өнерге бай екенін тағы бір мәрте дәлелдеді.
Сонымен қатар, кеш барысында түрлі байқаулар мен заманауи би сайыстары ұйымдастырылып, қала жастары өз өнерін ортаға салды. Жеңімпаз атанған жас таланттар мен қоғам өмірінде белсенділігімен танылған жастарға қала әкімінің арнайы алғыс хаттары табысталды. Бұл – олардың еңбегіне берілген әділ баға әрі болашаққа деген ынтасын арттыратын маңызды марапаттардың бірі.
«Qyzylorda Jastar Fest» – жай ғана мерекелік концерт емес, ол – жастардың басын қосқан, өнер мен спортты ұштастырған, болашаққа сенім сыйлаған үлкен алаң. Бұл шара жас буынның қоғамдағы орнын айқындап, олардың жаңашыл бастамаларына қолдау білдірген маңызды қадам ретінде тарихта қалары анық.
