Израиль премьер-министрі Биньямин Нетаньяху Газа секторын толықтай жаулап алу жөнінде әскери құрылымдарға нақты бұйрық берген. Бұл туралы Jerusalem Post, Channel 12 және басқа да израильдік БАҚ өкілдері хабарлап отыр.
Қазіргі таңда Газа аумағының шамамен 25%-ы әлі де ХАМАС қозғалысының бақылауында. Израиль тарапының айтуынша, бұл аудандарда ХАМАС тұтқында ұстап отырған израильдік азаматтар болуы мүмкін. Jerusalem Post басылымы бұл аумақтарды әскери операцияның негізгі нысанасы деп көрсетеді. Channel 12 арнасы X (бұрынғы Twitter) желісінде саяси тілші Амит Сегальге сілтеме жасап, үкіметтегі жоғары шенді шенеуніктің сөзін келтірді:
“Шешім қабылданды: біз Газа секторын толығымен басып аламыз. Әйтпесе, тұтқындар аштықтан көз жұмады, ал Газа ХАМАС-тың бақылауында қала береді. Бұл жолы кері шегінуге болмайды. Біз ХАМАС-ты толық жоюымыз қажет”.
Израиль тарапы ХАМАС толық тізе бүкпейінше, тұтқындарды босату мүмкін емес деп санайды. Премьер-министр Нетаньяху үкімет отырысында елдің алдында тұрған үш негізгі әскери-саяси мақсатты атап өтті:
Ол бұл операцияның Израиль үшін тарихи маңызға ие екенін айтып, халықаралық қысымға қарамастан, елдің қауіпсіздігін қамтамасыз ету бірінші орында екенін жеткізді.
Израильдің бұл шешімі әлемдік қауымдастықты алаңдатып отыр. БҰҰ, ЕО және бірқатар мемлекеттер тараптарды бірден атысты тоқтатуға және тұтқындарды босату бойынша келіссөздерді қайта жандандыруға шақырды. Алайда Тель-Авив билігі бұл қадамдарды тек ХАМАС толық жойылғаннан кейін ғана қарастыратынын ескертіп отыр.
Израиль тарапы ХАМАС-пен қандай да бір ымыраға келуден түбегейлі бас тартып отыр. Нетаньяхудың мәлімдемесіне қарағанда, бұл тек шектеулі операция емес, Газа секторындағы әскери-саяси тәртіпті түбегейлі өзгертуге бағытталған толыққанды басып алу жоспары. Алайда бұл шешім аймақтағы жағдайды одан әрі шиеленістіріп, бейбіт тұрғындардың жағдайын күрделендіруі мүмкін. Израиль мен Палестина арасындағы бұл қақтығыстың қандай бағытта дамитыны әлі белгісіз, бірақ қазіргі жағдай халықаралық қауіпсіздік үшін жаңа сын-қатерге айналып отыр.