Бұқаралық ақпарат құралдары қызметкерлері күніне орай Қызылорда қаласында боулинг пен бильярдтан турнир ұйымдастырылды.
Турнирдің ашылуында Қызылорда қаласы әкімінің орынбасары Бақытжан Омаров сөз сөйлеп, қатысушыларға сәттілік тіледі.
Боулингтен турнир нәзік журналист қыздарымыздың тек қалам шебері емес, спорт алаңындағы да нағыз көшбасшы екенін көрсетті.
Бұл турнирде «Кызылординские вести» газеті — ерекше дәлдігімен өзгелерден оқ бойы озық шығып, І орын иеленді. «Қоғам ТВ» телеарнасы сенімді ойын өрнегімен ІІ орынды қанжығасына байлады. «Қызылорда» облыстық телеарнасы сәтті тактикасы мен ұйымшылдығының арқасында ІІІ орынға ие болды. Ал, ынталандыру қаржылай сыйлығы Opennews.kz сайты мен «Халық» газетіне табыс етілді.
Бұдан бөлек, ақпарат саласындағы ер азаматтар бильярдтан өзара бақ сынасып, тартысты ойын өрнегін көрсетті. Жарыс қорытындысы бойынша І орынды «Қоғам тв» телеарнасының телебағдарлама дизайнері Батыршаев Ержан, ІІ орынды «Қазақстан» ұлттық телеарнасының облыстағы меншікті тілшісі Әділбек Жақанов, ІІІ орынды ардагер журналист Дүйсенбек Аяшұлы және «Қызылорда» облыстық телеарнасының қоюшы режиссері Әлібаев Жангелді иеленді.
Сонымен қатар, ерекше ойын көрсетіп, жақсы нәтижеге қол жеткізген «Халық» газетінің тілшісі Жахман Рыскелді мен «Хабар» телеарнасының меншікті тілшісі Нұрлан Жақыпбековке және «Qyzylorda» телеарнасының тілшісі Қозы-Көрпеш Жасаралұлына ынталандыру қаржылай сыйлығы табыс етілді.
Жеңімпаздарға лайықты құрмет көрсетіліп, келесідей қаржылай сыйақылар табысталды:
І орын — 100 000 теңге
ІІ орын — 80 000 теңге
ІІІ орын — 50 000 теңге.
Бұл турнирлер тек спорттық дода ғана емес, әріптестер арасындағы достық қарым-қатынасты нығайтуға, өзара қолдау мен түсіністікті арттыруға бағытталған игі шара болды.
