АҚШ БҰҰ Жарғысын және халықаралық құқықты бұзды. Бұл туралы Иран Ислам Республикасының Сыртқы істер министрі Аббас Арагчи мәлімдеді, деп хабарлайды «Адырна» тілшісі.
Айтуынша, Иранның бейбіт ядролық нысандарына жасалған шабуыл – өрескел әрекет.
«Бейбіт ядролық нысандарымызға жасалған агрессия АҚШ-тың Израильдің Иранға қарсы әскери шабуылын жоспарлауға және жүзеге асыруға қылмыстық түрде қатысқанын әшкереледі», – делінген мәлімдемеде.
Ол сондай-ақ бұл жағдайдың алдағы уақытта күрделі салдарға әкелуі мүмкін екенін атап өтті.
Министр Иран өз ұлттық мүдделерін қорғау үшін барлық мүмкін шараны қолдану құқығын өзінде қалдыратынын мәлімдеді.
Ал Иран Атом энергетикасы ұйымының басшысы Мохаммад Эслами МАГАТЭ бас директоры Рафаэль Гроссиге хат жолдап, ұйымды әрекетсіздік пен бейқамдық танытты деп айыптады. Сондай-ақ АҚШ-тың әрекетін ресми түрде айыптауға шақырды.
Еске салайық, 22 маусымға қараған түні АҚШ әуе әскери күштері Фордо, Натанз және Исфахандағы нысандарға шабуыл жасаған еді.