26 мамыр 2025 жылы Арканзас штатының түзеу мекемесінен аса қауіпті қылмыскер, 50 жылға бас бостандығынан айырылған Грант Хардин қашып шықты, – деп хабарлайды Aikyn.kz сайты snob.ru сайтына сілтеме жасап.
Associated Press дерегінше, ол 25 мамырда камерасынан шығып, өз қолымен тіккен полиция формасына ұқсас киімді киіп алған да, күзетшілерге «қызметтік тұлға» ретінде көрініп, еш кедергісіз қақпадан өтіп кеткен. Қазір штатты да, федералдық органдарды да жұмылдырған іздестіру шаралары жүріп жатыр.
Грант Хардин 2017 жылдың қазанынан бері жазасын өтеп келген. Ол сол жылы 59 жастағы су шаруашылығы қызметкері Джеймс Эпплтонды атып өлтіргенін мойындап, кінәсін толық мойындау келісімімен түрмеге түсті. Бұған дейін, 1997 жылы Хардин бастауыш мектеп мұғалімін зорлағаны үшін де кінәлі деп танылған. Екі іс қосылып, сот оған кемінде 50 жыл түрме жазасын кескен.
Ирониясы сол, Хардин өзі қашып шыққан түрменің сыртында бір кездері құзырет иесі болған. 2016 жылдың қаңтарынан сәуіріне дейін Арканзас штатындағы Гейтвэй қаласының полиция бөлімін басқарған.
Түрме әкімшілігі әзірге қашудың егжей-тегжейін толық айтқан жоқ, алайда Хардин форманы мекеме ішінде жасырын дайындап, оны киіп, түнгі ауысымдағы бақылаушыларды алдап соққаны анықталып отыр. Барлық мүмкін байланыс жолдары тексеріліп, штаттан шығу нұсқалары да қатаң бақылауға алынған.
Штат билігі тұрғындарды сақ болуға шақырып, Хардинді көрген жағдайда бірден 911-ге хабарласуды сұрады. Тәртіп сақшылары қашқынның қарулы болуы мүмкін екенін ескертіп, халыққа оның қасына жақындамауға кеңес берді.
Бұл оқиға Арканзас түрме жүйесіндегі қауіпсіздік хаттамаларын қайта қарау қажет екенін көрсетті: камералар мен бекеттер арқылы «офицер» кейпінде емін-еркін өтуі бақылау желісіндегі айқын олқылықты әшкерелеп берді.