Үкімет отырысы барысында Dereknet мұнай саласындағы технологиялық компанияның негізін қалаушы Саламат Қабдулов стартаптың бірегей артықшылықтары туралы айтып берді, – деп хабарлайды Үкіметтің баспасөз қызметі.
Мұнай-газ өндіруші компанияларға өндірісті тиімді басқаруға мүмкіндік беретін мұнай, газ және су өндірісін дәл өлшеу қажет. Dereknet нақты уақыт режимінде ұңғымалардан бастап тасымалдауға дейінгі көмірсутектерді өндірудің өндірістік өлшемдерін есептеудің бүкіл циклін үздіксіз автоматтандыруды қамтамасыз етеді.
«Біз бұл мәселелерді Derek Suite платформасымен шешеміз. Біз жасанды интеллектіні қолдана отырып, кен орындарының математикалық қосымшасын жасаймыз. Осылайша, клиенттер есептеулердің дәлдігін жақсартады және еңбек өнімділігін арттырады. Біз өндірістік мәселелерді шешудің әртүрлі, интеллектуалды тәсілін ұсынамыз. Өнімді отандастарымыз әзірледі, құқық Қазпатентте тіркелген. Біздің алгоритмдеріміз ҚазСтандартта аккредиттелген», – деп атап өтті Саламат Қабдулов.
Бүгінде Dereknet клиенттері – KPO, NCOC және TCO, сонымен қатар БАӘ-дегі – ADNOC компаниялары. Әлем бойынша серіктестік желі дамып келеді: TotalEnergies, Aker BP, Shell және басқа да пилоттық жобалар бар.