Мемлекет басшысы Қасым-Жомарт Кемелұлы Тоқаев қазақ тілін одан әрі дамыту мәселесі әрқашан мемлекеттік саясаттың маңызды бағыты болып қала беретінін ұдайы айтып келеді. Осы орайда Президент “Ана тілі” газетіне берген сұхбатында Ана тіліміз 2024 жылы әлемде ең кең таралған тілдердің арасында 79-шы орынға тұрақтағанын тілге тиек етіп, осы ретте күрделі әрі қарама-қайшылыққа толы кеңес заманында ана тілімізді әлемдік лингвистика картасынан жойылып кетуден сақтап қалған зиялы қауым өкілдерінің, ақын-жазушылардың, журналистер мен ғалымдардың, мұғалімдер мен мәдениет қайраткерлерінің, ауыл еңбеккерлерінің, яғни барша отаншыл азаматтардың еңбегін бағалауымыз қажет екенін атап айтқан болатын.
Осы орайда, өңірімізде қазақ тілінің өрісін кеңейтіп, мәртебесін арттыруға алдынғы буын ағаларымыздан бастап, жастар легі де зор белсенділік танытып келеді.
Кеше Достық үйінде Халықаралық «Қазақ тілі» қоғамының президенті Рауан Кенжеханұлының төрағалығымен Қызылорда облыстық филиалының жиыны өтіп, еңбек ардагері, «Парасат» орденінің иегері Аңсат Сәдуақас Әбдіқадырұлының мерейлі 80 жасқа толуына орай қазақы дәстүрге сәйкес құрмет көрсетілді. Сондай-ақ облыс әкімінің қабылдауында ана тілімізді дамытуға қосқан сүбелі үлесі үшін ҚР Ғылым және жоғары білім министрлігінің ведомстволық наградасы «Ахмет Байтұрсынұлы» төсбелгісімен марапаттағанын атап өтті.
Жиын барысында Халықаралық «Қазақ тілі» қоғамы президентінің бұйрығымен Қызылорда облыстық филиалының төрағасы болып Қызылорда аграрлы-техникалық жоғары колледжінің директоры, техника ғылымдарының кандидаты Жүнісов Абайбек Талғатұлы тағайындалды.
Тіл жанашырларының бас қосуында Сәдуақас ағамызды құттықтап, өз пікірімді білдірдім. Сондай-ақ қоғамдық бірлестіктің жаңа төрағасына сәттілік тілеп, алдағы жоспарларының жүзеге асуына тілектестік білдірдім. Өмірін ғылым саласына арнаған азаматтың мемлекеттік тіліміздің одан әрі дамуына ерекше үлес қосады деп есептеймін.
Айта кету керек, “AMANAT” партиясының қазақ тілін дамытуға ерекше назар аударуға бағытталған “Менің Елім-Менің тілім” жобасы да еліміздің түкпір-түкпірінде белсенді жүзеге асып, нәтижелі жұмыстар жүргізілуде.